စကားပြောခြင်း အနုပညာ။

ကျွန်တော် ငယ်စဉ်က လူတွေနဲ့စကားပြောရမှာ အတော်ဝန်လေးတတ်ပါသည်။ လူတွေနဲ့ပြောရတာ မကြိုက်လို့ တိရိဆန်တွေနဲ့ပြောရတာ ကြိုက်တယ်လို့လည်း မထင်စေချင်ပါ။ တကယ်ကတော့ ကျွန်တော် စကားမပြောချင်တာက လုပ်ဖော်ကိုင်ဖက် သူငယ်ချင်း အပေါင်းသင်းများ မဟုတ်၊ လှပချောမောသော ကောင်မလေးများလဲ မဟုတ်၊ ကာစတမ်မာဟုခေါ်သော စားသုံးသူများဖြစ်သည်။ စားသုံးသူဟု ဆိုရာတွင် အစားအသောက်လုပ်ငန်းအတွက်ဆိုလျှင် သင့်တော်ပေမယ့် ကျွန်တော်တို့လို အိုင်တီလုပ်ငန်းဘက်တွင်တော့ အဲဒီလို ခေါ်ရတာ အူကြောင်ကြောင်နိုင်လှသည်။ ဖောက်သည်ဆိုရင်လဲ ပိုဆိုးပေလိမ့်မည်။ မဖြစ်သေး။ သုံးစွဲသူဟုဆိုရင်လဲ မကောင်းတဲ့ဘက်ကို နွယ်နေသလိုမျိုးဖြစ်နေပြန်သည်။ ဖတ်ခဲ့ဘူးတဲ့ မှူခင်းဂျာနယ်ထဲက သူတွေကို မြင်ယောင်မိသည်။ မြန်မာစကားသည် အတော်ခက်သည်။ ထားလိုက်တော့ ကာစတမ်မာလို့ပဲ ခေါ်လိုက်မည်။ သူတို့၏နောက်တွင် အထက်အရာရှိဆိုသော သူများပါသည်။ သူတို့ပီးလျှင် တော့ငွေကြေးများ ကိုင်တွယ်တဲ့ အဖွဲ့ ဖြစ်သည့် အကောင့်တန့်များဖြစ်ကြသည်။ 


သူတို့နဲ့ စကားမပြောချင်သည့် အကြောင်းရင်း ကျွန်တော့မှာ ခိုင်ခိုင်လုံလုံရှိသည်။ အများကြီးရှာစရာမလို တစ်ခုသာ ရှိသည်။ ရစ်လို့ဖြစ်သည်။ ကိုယ်ကြိုက်သည့် ကောင်မလေးကရစ်လျင်ခံနိုင်ပေမယ့် ထိုသူများ ရစ်လျှင်တော့ မခံစားနိင်၊ ပိုပြီးကြေကွဲရသည်။ ကာစတမ်မာတွေရစ်လို့အိမ်ပြန်နောက်ကျခဲ့သည့် ရက်များမှာ မရေတွက်နိုင်အောင်ရှိသည်။ အထက်အရာရှိခေါ် ဘော့စ်တွေရစ်လျင် အပိုဆာဒါးတွေ ပိုပြီးလုပ်ရတယ်ဟု ထင်မိသည်။ အကောင့်တန့်များ ရစ်လျှင်တော့ မိမိ၏ ရှိစုမဲ့စု လစာလေးကနေ စိတ်မကောင်းခြင်းများစွာနဲ့ စိုက်ထားရသော ကားခများ၊ဟိုကြေးဒီကြေးများ ပြန်ရဖို့ နှေးကွေးတတ်သည်။ တိုက်ဆိုင်မှုတွေလား မပြောတတ် ကျွန်တော်ကြုံခဲ့ရသော အကောင့်တန့်များမှာ အများစုက အပျိုကြီးများဖြစ်ကြသည်။ ငယ်စဉ်ကကြားခဲ့ရသည်မှာလဲ အပျိုကြီးများသည် ပို၍ရစ်တတ်ကြသည်ဟုဆိုတော့ နဂို အခံနဲ့ပင် ကိုယ့်ကို ရစ်နေသည်ဟု ခံစားမိသည်။ တကယ်တော့ အဲလိုမဟုတ်။ သူငယ်ချင်း အကောင့်တန့်များရှိနေ၍ ပြန်ဖြည်မှ ဖြစ်မည်။

ဒီလိုနဲ့ အသက်တွေကြီးလာသလို၊ လုပ်ခဲ့တဲ့ အလုပ်တွေ၊ အပြောင်းအလဲတွေလည်း အမျိုးစုံလာသည်။ တချိန်က ကွန်ပြူတာနောက်တွင် ပေကပ်ပြီး ထိုင်ရမထ နည်းပညာကို ချစ်ခင် ခုံမင်စွဲမက်စွာနဲ့ နေ့ညမနား ကြိုးစားခဲ့ရင်   တနေ့ ရွှေထီးဆောင်းရမယ်ဆိုတဲ့ အတွေးတွေဟာ အနည်းငယ် အစွန်းရောက်သလို ခံစား လာရသည်။ ရောက်လေရာ နေရာတိုင်းမှာ စကားမပြာပဲပီးသွားတဲ့အလုပ် ဟူ၍ မရှိသလောက်ပင်။ တချို့ဆို ဘာမှတောင် မလုပ်လိုက်ရပဲ စကားပြောရင်းနဲ့ပင် အဆင်ပြေသွားတာတွေ ရှိသည်။ ရစ်လှပါသည်ဆိုသော ကာစတမ်မာများကို သူတို့စိတ်ကျေနပ်အောင် စိတ်မခုအောင် ပြောတတ်ဆိုတတ်လျှင် သိပ်မရစ်ကြတော့။ ကံကောင်းရင် ဟယ်လီကော်ပတာတောင် အလကား စီးရတန်ကောင်း၏။ ကျွန်တော့် ကာစတမ်မာထဲမှာ ဟယ်လီကော်ပတာ ငှားသည့်သူလည်းပါသည်။ တော်ကြာ အပေါ်ရောက်တော့မှ အရင်က မကျေနပ်တာတွေ သတိရပြီး တွန်းချလျှင် ဒုက္ခရောက်မည်စိုး၍ လိုက်မစီးခဲ့။ ဘော့စ်ဆိုသည့်သူများကလည်းကိုယ်က ရေကုန်ရေခမ်း ညစ်လို့မကျန် ခါလို့မကျအောင် လုပ်ခဲ့သည့်တိုင် သူတို့မမြင်၊ မသိလျှင် အလုပ်လုပ် နေတယ်လို့ မထင်။ လစာတိုးဖို့ဆို ဝေလာဝေး။ မှားရင်၊ ကာစတမ်မာ ကွန်ပလိန်းတက်လျှင် အရင်ဆုံးသိသည်။ ဒီတော့ သူတို့ကို ကိုယ်အလုပ်လုပ်ကြောင်း တော်ကြောင်း ပြဖို့ ပြောပြဖို့လိုသည်။ ခပ်ချေချေနေလို့မရ။ ဖားခိုင်းတာ မဟုတ်။ မိမိ၏ အရည်အသွေးကို ဖုံးနေသော ပြာများကို ကိုယ်တိုင်ခါချပီး ရဲရဲတောက်နေသော ကိုယ့်ရဲ့ မီးစတွေကို ဖော်တတ်ဖို့လိုသည်။ အကောင့်တန့်များကတော့ သူတို့တောင်းဆိုသည့် အချက်အလက်၊ စာရွက်စာတမ်းများ စုံလင်အောင် အချိန်မှီ ပေးနိုင်ရင် သိပ်ပြဿနာ မရှိ။ မသကာ နောက်ကျရင် တစ်လပေါ့။ သူတို့ရဲ့ အလုပ်သဘောအရ စာရင်းကို အကြွေးထားလို့မရ။


ဒီနေရာမှာ ကျွန်တော်ပြောလို့သည့် အချက်ကို တလွဲထင်သွားမှာဆိုးရသည်။ ကိုယ်လျှေက်နေတဲ့ ပညာသည် လမ်းကြောင်းမှာ ဘာမှ မတတ်၊ မလေ့လာပဲ စကားပဲ ပြောနေလို့မရ။ ကိုယ်လုပ်နေတဲ့ အလုပ်ကို ကျွမ်းကျင်ဖို့ က အဓိက လိုအပ်ချက်ဖြစ်သည်။ ကာစတမ်မာတွေက အချဉ်တွေမဟုတ်၊ သူတို့လည်း ဂူးဂဲ သုံးတတ်တာကို မေ့ထားလို့မရ။ ဘော့စ်ဆိုသည့် သူများကိုလည်း ဒီဘဲကြီး သေချာမသိတော့ပါဘူးကွာဆိုပြီး အဲနီးဟောင်း ဘတ်လို့မရ၊ သူတို့လည်း ငယ်ရာက ကြီးလာသူများဖြစ်သည်။ တချို့ဆို ကစားသမား ဘဝမှာ သိပ်မအောင်မြင်ပေမယ့် နည်းပြလုပ်သည့်အခါ ပိုမြင် ပိုကောင်းအောင် လုပ်တတ်ကြသည်။ လက်ရှိ မန်ယူနည်းပြ၊ အရင် ချယ်ဆီးနည်ပြဟောင်း မော်ရင်ဟိုကို ပဲကြည့်။ သူယူခဲ့တဲ့ ဖလားတွေ က နည်းတာမဟုတ်။သူ အင်တာဗျူးပြီး ခန့်လိုက်လို့ သာ ကိုယ်ဒီအလုပ်ကို ရောက်လာခြင်းဖြစ်သည်။   ဒီတော့ ကိုယ်တကယ်မလုပ်ပဲ ဖြီးနေရင် သူတို့အလွယ်တကူသိသည်။ ဆိုလိုချင်တာက နည်းပညာ တစ်ခုတည်း သိနေတတ်နေလို့မရ၊ ကိုယ့်ရဲ့ အလုပ်တက်လမ်း ကယ်ရီယာ တိုးတက်ကြောင်းမှာ စကားပြောနိင်ဖို့ အရေးအသားကောင်းဖို့၊ ပြဿနာတစ်ခု ပေါ်လာရင် နည်းပညာ တစ်ခုတည်းသာမက ဘက်ပေါင်းစုံကနေ လိမ္မာပါးနပ်စွာ ဖြေရှင်းနိင်ဖို့တွေပါ လိုအပ်ကြောင်း ပြောပြလိုခြင်းဖြစ်ပါသည်။


စစ်စကိုတွေ ဂျနီပါတွေ ဗွီအမ်ဝဲတွေ အရေးပါသလို ဆော့ဖ် စကေးလို့ခေါ်တဲ့ စကားပြောခြင်း အနုပညာရပ်ကိုပါ အလေ့အကျင့်လုပ်ပြီး ကိုယ့်ရဲ့ အရည်အသွေးကို မြှင့်တင်ကြပါလို့ တိုက်တွန်း လိုက်ရပါသည်။


ကိုဖြိုး