လိုရာသွားဖို့ Route-maps

Routing ကိုလေ့လာတဲ့အခါမှာ Static Route ကနေစပီးတော့လေ့လာရပါတယ်။ ဒါမှ Network တစ်ခုနဲ့တစ်ခု ဘယ်လိုသွားရမယ်၊ Gateway တို့ Next-hop တို့ စတဲ့အရာတွေကို နားလည် သဘောပေါက်မှာ ဖြစ်ပါတယ်။ Router လေးလုံးလောက်နဲ့ အသွားအပြန် သွားလို့ရအောင် လေ့ကျင့်ပီးရင်တော့ Return route တွေ end to end reachability တွေကိုပါ မှန်ကန်စွာ Configure လုပ်နိုင်လာမှာဖြစ်ပါတယ်။ အဲဒီမှ တစ်ဆင့် Dynamic Routing ကိုဆက်ပီးတော့ လေ့လာရပါတယ်။ Dynamic Routing protocols တွေရဲ့အသုံးပြုပုံ၊ Configuration လိုအပ်ချက်တွေ၊ (ဥပမာ OSPF Area ၊ EGIRP/BGP AS ၊ Router ID တို့No Auto-Summary တို့) ကိုလေ့လာရပါတယ်။ ပီးရင် Protocols နှစ်ခု သုံးခုရောပီး Multi-protocols အသုံးပြုပုံတွေကို နားလည်အောင် LAB လုပ်ကြည့်ရပါတယ်။ ဒီနေရာမှာ အဓိကပါလာမှာကတော့ Route Redistribution ပါ (Redistribution အကြောင်းကို ရေးထားပီးပါပီ)။ Redistribution ဟာသိပ်မလွယ်ပါဘူး၊ Configuration မှားရင် Routing Loop တွေဖြစ်ပီး Network တစ်ခုလုံး ပြဿနာတက်သွားနိုင်ပါတယ်။ ဒီတော့ Redistribution နဲ့အတူ မဖြစ်မနေတွဲသုံးရမယ့် အရာကတော့ Route-map ပဲဖြစ်ပါတယ်။

Route-map ကို Redistribution မှာသာမကပဲ Policy Based Routing တို့BGP Configuration တို့ မှာလည်း အသုံးများကြပါတယ်။ Route-map မပါပဲနဲ့ပြည့်စုံတဲ့ Configuration ၊ လိုချင်တဲ့ Routing Path ကိုတည်ဆောက် ဖို့ရာအလွန်ခက်ပါလိမ့်မယ်။ ဘာနဲ့တူမလဲဆိုရင် မြို့ပြတစ်ခုရဲ့ လမ်းကြောင်းတွေကို ရေးဆွဲရာမှာ လမ်းဖောက်၊ တံတားဆောက်၊ မီးပိုင့်တပ်ဆင်ပေးလိုက်ရုံနဲ့ အဆင်ပြေသွားပီလို့ပြောလို့မရသလိုပါပဲ။ ဥပမာ တစ်လမ်းမောင်း ထားသင့်တဲ့နေရာထား၊ မဝင်ရသတ်မှတ်တဲ့နေရာသတ်မှတ်၊ စတဲ့အရာတွေထပ်ပီး စီမံရသလိုပဲ Route-map ရဲ့အကူအညီနဲ့ ကိုယ်လိုချင်သလိုဖြစ်စေ၊ လုပ်ငန်းခွင်ရဲ့လိုအပ်ချက်အရ ဖြစ်စေ အဆင်ပြေအောင် လုပ်ဆောင်ရပါတယ်။ Route-map မသုံးရင်ကော မရဘူးလားလို့မေးခဲ့ရင်တော့ ရတယ်လို့ဆိုရမှာပါ ဒါပေမယ့် ရိုးရှင်းတဲ့ Network တွေမှာပဲ ရပါလိမ့်မယ်။ ရှုပ်ထွေးတဲ့ Network တွေနဲ့လိုအပ်ချက်အမျိုးမျိုးနဲ့ပြည့်နေတဲ့ Network တွေမှာတော့ မရှိမဖြစ်အသုံးပြုရပါလိမ့်မယ်။

Route-map ဟာ ACL လို Permit/ Deny တွေနဲ့ကိုယ်လိုချင်တာကို ထိန်းချုပ်လို့ရသလို ACL အတိုင်းပဲ ရေးထားတဲ့ အစဉ်လိုက်အတိုင်း ဘာလုပ်မယ်ဆိုတာကို ဆုံးဖြတ်ပါတယ်။ IF/ELSE လိုမျိုး ဒီဟာတွေ့ရင်ဖြင့် ဒီလိုလုပ်၊ ဒါမှမဟုတ်ရင်တော့ ဟိုလိုသွား စသဖြင့် ရေးလို့ရပါတယ်။ ဒါပေမယ့် Route-map ဟာ ACL ၊ Prefix-list ၊ Interface ၊ IP address ၊ Metric ၊ Route-Type စတာတွေကို Match လုပ်ပီးမှ Route-map ဟာ အသက်ဝင်လာ တာပါ။ ACL ထက်ပိုမိုကောင်းမွန်တဲ့ Permit/ Deny Statement တွေရေးလို့ရသလို ACL မှာမရတဲ့ Set Commands တွေနဲ့Route Attributes တွေ၊ Metric တို့Next-Hop တို့တွေပါ ပြောင်းလဲပေးတဲ့ လုပ်ဆောင်ပေးနိုင်တဲ့ အရာတွေ ပါဝင်ပါတယ်။ ဒီတော့ Configuration ပိုင်းအရကြည့်ရင် Route-map မှာ Match နဲ့Set ပဲပါ ပါတယ်။ Adminရဲ့ခြုံ ငုံကြည့်ရမည့် အမြင်နဲ့Match Attribute တွေကို ပါးနပ်စွာရွေးချယ် ရေးသားမှုက ပိုပီးတော့ အရေးပါတယ် လို့ဆိုရပါမယ်။ ဒါ့အပြင် Match statement တစ်ခုမှာ နှစ်မျိုးသုံးမျိုးရေးတာ OR တို့၊ တစ်ကြောင်းစီရေးရင် AND ၊ Match ဖြစ်ပီးသားကို ဆက်ပီးထပ်သွားဖို့အတွက် Continue တို့တွေကိုပါ သိထားရင်တော့ အသေးစိတ် အသုံးချနိုင်လာပါလိမ့်မယ်။

Route-map ကို Redistribution မှာအသုံးပြုထားပုံ

router ospf 100
  redistribute rip route-map rip-to-ospf
route-map rip-to-ospf permit
match metric 1
  set metric-type type1

ဒီနမူနာမှာ RIP Routes တွေကို OSPF အထဲကို Redistribution လုပ်တဲ့နေရာမှာ အသုံးပြုထားတာ ဖြစ်ပါတယ်။ လိုချင်တာက RIP route တွေအထဲက Metric 1 နဲ့ဝင်လာတဲ့ Routes တွေကို OSPF External Route Type 1 အဖြစ်နဲ့Redistribution လုပ်ဖို့ဖြစ်ပါတယ်။ ပုံမှန်ဆိုရင် OSPF က Redistributed လုပ်ထာတဲ့ External Routes တွေဟာ Type 2 အနေနဲ့Inject လုပ်ပါတယ်။ Type 2 ဆိုရင် Cost ကစားလို့အဆင်မပြေတဲ့အတွက် Route-map ရဲ့အကူအညီကိုသုံးပီး Type 1 အဖြစ်သို့ ပြောင်းလဲပေးလိုက်ခြင်း ဖြစ်ပါတယ်။

Route-map ကို Policy Based Routing မှာအသုံးပြုထားပုံ

access-list 1 permit ip 192.168.1.0 0.0.0.255
route-map Diff-path permit 10
  match ip address 1
  set ip next-hop 10.10.10.1
route-map Diff-path permit 20
 
Interface FastEthernet 0/1
  ip policy route-map Diff-path

ဒီနမူနာကတော့ ACL 1 ကလာတဲ့ Traffic ဟာ Interface FE0/1 ကိုရောက်လာရင် Routing table ရဲ့ အဆုံးအဖြတ်အရ မသွားစေပဲ 10.10.10.1 ကနေသွားဖို့လမ်းကြောင်းပြောင်းပေးလိုက်တာဖြစ်ပါတယ်။ ကျန်တာတွေကိုတော့ ပုံမှန်အတိုင်းပဲသွားပေါ့။

Route-map ကို BGP configuration မှာအသုံးပြုထားပုံ

access-list 1 permit ip 192.168.1.0 0.0.0.255
route-map Only-This permit 10
  match ip address 1
router bgp 100
  neighbor 10.10.10.1 route-map Only-This out

ဒီနောက်ဆုံးဥပမာမှာတော့ BGP Route advertisement မှာ ကိုယ်ပေးချင်တဲ့ Network တစ်ခုကို ACL ရေး၊ Route-map နဲ့Match ပီးတော့ Neighbor advertisement မှာယူသုံးထားခြင်းဖြစ်ပါတယ်။ တစ်ဖက်က Neighbor ဟာ 192.168.1.0/24 ဆိုတဲ့ Route တစ်ခုကိုပဲ မြင်ရမှာဖြစ်ပါတယ်။

အခုလောက်ဆို Route-map ရေးဆွဲပီး လိုရာရောက်အောင်သွားလို့ရပီလို့ထင်ပါတယ်။



ကိုဖြိုး